lagu-gereja.com/gbkp
Gereja Batak Karo Protestan
View : 1684 kali
Khotbah GBKP 2016
02 OKTOBER 2016
(Masmur 149:1-9)

BIMBINGEN KHOTBAH 02 OKTOBER 2016 Thema:LANDEK DINGEN RENDE DEM PENGATAKEN BUJUR Minggu Budaya II. Pdt. Maria E br Sitepu - Masmur 149:1-9
BIMBINGEN KHOTBAH 02 OKTOBER 2016
Thema:LANDEK DINGEN RENDE DEM PENGATAKEN BUJUR
Minggu Budaya II.
Pdt. Maria E br Sitepu
Invocatio : Epesus 5 : 19
Ogen : 2 Samuel 6 : 1 - 5
Renungen : Masmur 149 : 1 - 9


-          Pengantar
Landek ras rende eme dua hal si nggo semal ibas kegeluhen kalak karo. Hampir kerina kalak karo meriah akapna rende ras landek ibas acara-acara si ibahan kade-kadena ntah pe rende ras landek sisada ngenca guna melepas rasa stress. Tapi sadar ntah la sadar melala kalak la memahami, kepeken rende ras landek enda lit ertina ibas kita ngelakokenca.

1.      Rende
Pernahkah si begi ibas zaman orde baru pemerintah melarang enden-enden si bertemakan hal-hal si erbahanca kalak morah atena ntahpe adi bahasa gundari cengeng. Kebiaren pemerintah ibas paksa si e eme enden-enden si bage banci cedai moralitas generasi muda ibas paksa si e. emakana pemerintah erbahanca aturen si cukup keras.
Hal si enda situhunna curminken kepeken enden-enden enda memiliki dampak si luar biasa nandangi sekalak jelma.
2.      Landek
Landek ntah pe tari-tarian tentuna eme salah sada kinibayaken si lit i tengah-tengah negaranta enda, la terkecuali kalak karo, melala tari-tarian si lit ibas masyarakat karo, si tentuna memiliki makna ibas pementasan ntah pe penggunaan.
Tapi aminna pe nggo masuk ibas zaman modern enda, salah sada hal si perlu iperdiateken ibas kita landek bas masyarakat karo, kepeken kerina gerakan ibas landek enda lit ertina. Hal si enda si la pahami kalak. Contohna misalna :
-          Gerak tan kawes nangkih, gerak tan si kemuhen ku teruh, e ermakna kepeken kalak karo rusur rukur leben sope ia erbahanca keputusan (tengah rukur).
-          Gerak tan kawes ku teruh, gerak tan kemuhen ku datas, e ermakna kalak karo sisampat-sampaten.
-          Rsdna kerina
Jadi teridah kepeken rende ras landek enda labo ilakoken bage-bage saja, tapi hal si enda, memiliki dampak ras makna ibas kegeluhen, khususna nandangi kalak karo.
Tapi siteridah ibas kinata gundari enda, hal si enda nggo lanai perdiateken kalak, gundari landek ras rende enda ibahan gelah meriah-meriah saja ntah pe lanai bermakna. Keriahen ukur nggo jadi perayaken, nggo lanai darami makna ibas 2 hal enda.
Emakana ibas minggu enda, rikutken minggu GBKP eme minggu Budaya, kita nggit ingetken mulihi uga situhuna pemaknaan landek ras rende enda terkhusus adi silakoken i tengah-tengah gerejanta enda.
-          2 Samuel 6 : 1-5
Ibas bagin pengogen si pemena enda, nuriken keinginan Raja Daud guna mindahken peti perpadanen ku Jerusalem, erkiteken adi siidah ibas mazmur 27:4, ituriken Daud uga ketedehen atena guna eringan i rumah Dibata segedang-gedang geluhna.
Hal siibahan Daud enda pe la banci lepas ibas kinata ibas paksa si e, ija daud nggo jadi raja kalak Israel ras Juda (2 Samuel 5:1-5) bagepe daud nggo ka ngerebut Kota Yerusalem ras nggo tading ija (2 Samuel 5:6-10).
Ibas Daud maba peti perpadanen, lit piga hal si perlu siperdiateken :
  1. Ibas ayat 1-2, teridah je uga persiapen silakoken Raja Daud guna maba peti perpadanen e mulih ku Yerusalem. Hal si enda, tentuna la banci sipungkiri uga peti perpadanen enda jadi sada hal si perebutken bangsa ibas paksa si e, erkiteken melala bnagsa ngidahsa uga kehebaten bangsa Israel ibas medan peperangan adi peti perpadanen ras kalak Israel.
  2. Ibas ayat 3, ikataken eme peti perpadanen e, ibuat ibas rumah abinadap nari (bdk 1 Samuel 4:1 - 7:1). Ibas rumah abinadap enda, peti perpadanen kurang lebih nggo 20 tahun tading rumahna. Si enda tentuna erkiteken paksa sie bangsa Israel italuken bangsa Pilistin ras peti perpadanen ibuat kalak Pilistin, tetapi erkiteken peti perpadanen enda maba pinakit man kalak Pilisti maka iulihken kalak pilistin me peti perpadanen enda. tapi harus siinget ibas 2 Samuel 5:17-25, maka Israel banci naluken Pilistin ibabo kepemimpinen raja Daud.
  3. Ibas ayat 5 siidah, uga raja Daud ras bangsa Israel, erkiteken nggo ka jumpa ras peti perpadanen si ipercayai jadi manifestasi Dibata ibas paksa si e ras nggo banci ibaba mulihken ku Yerusalem.
Ibas keriahen enda pe, bangsa Israel rende dingen landek asa gegehna muji Tuhan. iikuti sora alat-alat musik (ayat 5).
Piga hal si banci siperdiateken ibas si e :
-          Asa gegehna.
-          Muji Tuhan
-          Make alat musik
Hal si e cidahken uga kalak Israel ibas paksa si e tuhu-tuhu ermeriah ukur alu kai silakokenna. tapi harus siinget istilah muji Tuhan jenda banci seri ras ngataken bujur ibas kerina perbahanenNa nandangi bangsa Israel.  
-          Masmur 149 : 1-9
Ibas mazmur 149 enda pe, siidah uga pemasmur ibas nandangi pendungi kitab enda, erpengarapen gelah kitab tetap ngendeken enden-enden pujin man Dibata, erkiteken :
  1. Nepa Kita
  2. Ia Raja Kita
Alu :
  1. Landek
  2. Alu alat musik
Enda nggambarken enden-enden si penangkih man Dibata e kerina erkiteken pengataken bujurta man baNa. Tapi inget ka labo terjeng rende ngenca tapi landek ka. Erkiteken si e curminken uga keriahennta tuhu-tuhu (banci si nin uga adi kita sangana meriah ukurta, selain rende pasti dagingnta end ape nggit ia bergoyang, jadi la tuhu adi kita nggejapken keriahen tapi la nggit kita landek ntah pe goyang).
Alu cara si bage sibahan, Dibata pasti nampati kita ibas kerina persoalen (ayat 4-9) labo perlu bage kai si biasa ipahami kita. contoh
  1. Ibas ayat 6, tangkas kal alu sora megang njemak pedang entelap, tapi tetap pujilah Tuhan. tentuna la bagi kesemalen adi kalak sangana ibas perang tentuna la lit keriahen tapi ketegangan. Tapi Dibata nurikenca si e beda adi kita nggo erpenalem man Dibata saja.
-          Aplikasi
adi mulih kita ku invocationta ibas wari enda, kerina kai siibahan manusia tentuna harus bermakna positif subuk man dirinta bagepe man kalak. Ibas bahan pengogenta teridah uga Daud pe ncidahken kekuatan positif ibas rende ras landek i tengah kegeluhen bangsa Israel ibas paksa si e.
kita sedekah enda ibas budaya ntah pe gerejannta rende ras landek lanai bagi kai siiarapken. Rende ras landek nggo lanai jadi alat guna ngataken bujur ibas perkuah ate Tuhan nandangi kita. tapi nggo jadi semacam entertainment ntah pe ate-ate saja.
Emakana ibas minggu budaya enda, marilah kita mulihken ngukuri sedekah enda,uga kin nggo sibahan ibas kita ngataken bujur man Dibata, apakah terjeng babah ngenca (rende) ntah perbahanen ngenca (landek) ntah dua-duana?
Bagepe ibas kita rende ras landek enda, kai kin situhunna perayakennta ? apakah enda erkiteken guna ncidahken man kalak saja, ntah guna ngataken bujur man Dibata ibas kerina si nggo ibahanna nandangi kita. 

Label:   Masmur 149:1-9 











Selanjutnya:
Khotbah Khotbah GBKP Minggu 16 Oktober 2016 - Roma 15:15-21

Sebelum:
BIMBINGEN PJJ 25 September - 1 Oktober 2016 KUTATANG-TATANG KAM SEH METUA Nats : Jesaya 46:3-4 Pdt. Maria E br Sitepu

All Khotbah GBKP 2016:
Warta Jemaat

BACAAN ALKITAB SETAHUN:

MENU UTAMA:
Catatan Penting Tata Ibadah GBKP (Gereja Batak Karo Protestan)(7)
Khotbah GBKP 2016(7)
Khotbah GBKP 2017(9)
LAGU KITAB ENDE-ENDEN GBKP(218)
Partitur Lagu Karo(3)
Perpulungen Jabu-Jabu (PJJ) 2016(2)
Pustaka Sibadia - Perjanjian Baru(22)
Pustaka Sibadia - Perjanjian Lama(51)
Sermon Khotbah GBKP 2023(2)
Sermon Khotbah GBKP 2024(1)
Tentang GBKP(5)

Arsip Khotbah GBKP 2016..

Sermon GBKP setiap hari
Register   Login  


Sermon Khotbah Minggu GBKP 2024
     popular pages    |   Register    |  Login    | e-mail: admin@lagu-gereja.com   © 2012 . All Rights Reserved.