lagu-gereja.com/gbkp
Gereja Batak Karo Protestan
View : 1174 kali
Pustaka Sibadia - Perjanjian Lama
Jumat, 14 Oktober 2016

Kejadin 10
Sinursur Sem, Ham, ras Japet
(1Kro. 1:5-23)
1Enda me sinursur Sem, Ham, ras Japet, anak-anak Nuah. Teluna kalak enda mupus anak-anak dilaki kenca banjir si mbelin e. 2Anak-anak Japet si dilaki e me kap: Gomer, Magok, Madai, Jawan, Tubal, Mesek, Tiras. 3Kesusuren Gomer e me kap bangsa Askenas, Ripat, ras Togarma. 4Kesusuren Jawan e me kap bangsa Elisa, Sepanyol, Kiprus, Rodes. 5Kalak enda me nini kalak si nggeluh i tepi lawit ras i bas pulau-pulau. Enda me kerina kesusuren Japet si nggeluh i bas suku ras negeri si pelain-lain, janah tep-tep terpuk pelain-lain cakapna.
6Anak-anak Ham e me kap Kus, Mesir, Libia, ras Kanaan. 7Kesusuren Kus e me kap bangsa Seba, Hawila, Sabta, Raama, Sabteka. Kesusuren Raama e me kap bangsa Syeba ras Dedan. 8Kus mupus sada anak dilaki, Namrut gelarna. Namrut me manusia si pemena i doni enda jadi kalak si mbisa. 9Arah penampat TUHAN Namrut jadi perburu si merawa, e maka lit kuan-kuan ngataken, "TUHAN lah si erbahan kam jadi perburu si merawa, bali ras Namrut." 10Mula-mula si termasuk ku bas kerajanna e me kap: Babil, Ereh, Akat; teluna daerah enda e me i bas daerah Babilon. 11I Babilon nari lawes Namrut ku Assur, e maka ipantekina kuta Niniwe, Rehobot-Ir, Kalah, 12ras Resen, kelang-kelang Niniwe ras kuta Kalah, sada kuta si mbelin.
13Kesusuren Mesir e me kap: bangsa Lidia, Anam, Lehap, Naptu, 14Patrus, Kaslu ras Kaptur; i bas bangsa enda nari me asalna kalak Pilisti.
15Anak Kanaan e me kap Sidon sintua, ras Het. 16Kanaan pe nini bangsa Jebusi, Amori, Girgasi, 17Hewi, Arki, Sini, 18Arwadi, Semari, Hamati. Kedungenna merap me suku-suku bangsa Kanaan enda, 19seh maka baleng-baleng daerah Kanaan mulai i Sidon nari terus ku Selatan kempak Gerar, deher Gasa, ras ku Timur kempak Sodom, Gomora, Adma, ras Seboim deher Lasa. 20Enda me kerina suku-suku sinursur Ham si nggeluh i bas negeri si pelain-lain, janah tep-tep terpuk lain cakapna.
21Sem kaka Japet, e me kap nini kerina bangsa Heber. 22Enda me anak-anak si dilaki i bas Sem nari: Elam, Ashur, Arpaksat, Lut, ras Aram. 23Kesusuren Aram e me kap bangsa Us, Hul, Geter, ras Mesek. 24Arpaksat e me kap bapa Selah. Selah e me kap bapa Eber. 25Anak Eber lit dua kalak dilaki: sada Peleg gelarna, erkiteken i bas paksa si e bangsa i doni erbelah-belah; anakna si sada nari Joktan gelarna. 26Sinursur Joktan e me kap bangsa Almodat, Selep, Hasarmawet, Jerah, 27Hadoram, Usal, Dikla, 28Obal, Abimael, Syeba, 29Opir, Hawila, ras Jobap. Kerina bangsa-bangsa e, e me kap sinursur Joktan. 30Taneh ingan kalak enda nggeluh mulai i Mesa nari seh ku Separ i taneh deleng-deleng si arah matawari pultak. 31Enda me kerina sinursur Sem, pelain-lain sukuna, negerina ras cakapna.
32Enda ndai me kerina sinursur si Nuah sue ras suku-suku bangsana rikutken kesusurenna sekalak-sekalak. I jenari me kerina bangsa-bangsa si lit i babo doni enda, kenca banjir si mbelin e.











Selanjutnya:
Kejadin 11

Sebelum:
Kejadin 9

All Pustaka Sibadia - Perjanjian Lama:
Warta Jemaat

BACAAN ALKITAB SETAHUN:

MENU UTAMA:
Catatan Penting Tata Ibadah GBKP (Gereja Batak Karo Protestan)(7)
Khotbah GBKP 2016(7)
Khotbah GBKP 2017(9)
LAGU KITAB ENDE-ENDEN GBKP(218)
Partitur Lagu Karo(3)
Perpulungen Jabu-Jabu (PJJ) 2016(2)
Pustaka Sibadia - Perjanjian Baru(22)
Pustaka Sibadia - Perjanjian Lama(51)
Sermon Khotbah GBKP 2023(2)
Sermon Khotbah GBKP 2024(1)
Tentang GBKP(5)

Arsip Pustaka Sibadia - Perjanjian Lama..

Sermon GBKP setiap hari
Register   Login  


Sermon Khotbah Minggu GBKP 2024
     popular pages    |   Register    |  Login    | e-mail: admin@lagu-gereja.com   © 2012 . All Rights Reserved.