lagu-gereja.com/gbkp
Gereja Batak Karo Protestan
View : 1172 kali
Pustaka Sibadia - Perjanjian Lama
Jumat, 14 Oktober 2016

Jeremia 1 / Yeremia 1
1Isi kitap enda e me perkatan Jeremia anak Imam Hilkia si ringan i kuta Anatot i negeri Benyamin. 2Kata TUHAN seh man Jeremia i bas tahun pesepuluh teluken tupung Josia anak Amon jadi raja Juda. 3Kenca si e pe rusur denga nge reh kata TUHAN man Jeremia tupung Joyakim anak Josia jadi raja seh ngayak pengkeri-kerin tahun pesepuluh sadaken pemerentahen Raja Sedekia anak Josia. I bas bulan pelimaken i bas tahun e kalak Jerusalem ibaba tertaban ku pembuangen.
Pendilo TUHAN man Jeremia
4Kata TUHAN reh man bangku nina, 5"Kupilih kam ope denga Kubereken man bandu kegeluhen. Ope denga kam tubuh enggo Kuserapken kam jadi nabi man bangsa-bangsa.
6Ningku ngaloisa, "O TUHAN si Erdolat, la kueteh uga melasken kata, ngudasa denga aku."
7Nina TUHAN man bangku, "Ola katakenndu kam ngudasa. Tapi laweslah ku bangsa-bangsa ku ja kam Kusuruh. Kataken man bana kerina si Kuperentahken man bandu. 8Ola kam mbiar sabap Aku kap ras kam guna mulahi kam. Aku kap TUHAN si enggo ngerana!"
9Kenca bage ipepinter TUHAN tanNa lako ngkuit biberku, jenari nina man bangku, "Begiken, Kubereken man bandu perkatan-perkatan si la banci la ibelaskenndu. 10Sendah Kubereken man bandu kuasa nandangi bangsa-bangsa ras kerajan-kerajan lako mbungkarken dingen ngeruntuhken, lako ngkernepken dingen ngeradasken, lako manteki dingen nuan."
Dua pengenehenen
11Isungkun TUHAN aku nina, "O Jeremia kai si idahndu?" Ningku njabapsa, "Kuidah sada ciken kayu ketapang." 12Nina TUHAN, "Payo si idahndu e, sabap tuhu mejehe Aku ngenehen katangKu idalanken."
13Ngerana ka tole TUHAN man bangku nina, "Kai denga si idahndu?" Ningku njabapsa, "Kuidah kudin taneh luam isina, rehna i Utara nari." 14Nina TUHAN man bangku, "I Utara nari reh me ukumen si luam lako ngukum kerina negeri enda." 15Sabap Kudilo kerina bangsa-bangsa si arah Utara, gelah kerina raja-rajana namaken kursi kinirajanna i bas pintu gerbang Jerusalem dingen sekelewet benteng-bentengna, bage pe i sekelewet kerina kuta-kuta Juda. 16Kuukum ateKu bangsangKu, erkiteken dosa-dosa si enggo ibahanna; itundalkenna Aku. Ipersembahkenna persembahen man dibata-dibata si deban, ibahanna gana-gana jenari nembah man bana. 17Ersikapken Jeremia, to kataken kerina si Kuperentahken man bana. Ola mbiar, gelah ola kam pagi Kubahan mbiar tupung kam i tengah-tengahna. 18-19Jeremia dengkehkenlah! Kerina kalak si ringan i negeri enda subuk raja-raja Juda, pegawai-pegawaina, imam-imamna, bage pe kerina pendudukna la banci la keke ngelawan Kam. Tapi sendah Kubereken man bandu gegeh lako ngelawan ia kerina. Kubahan kam bali ras kuta si erbenteng, desken binangun besi, dingen bagi tembok tembaga. La kam tertalukenca, sabap Aku kap ras kam, Aku si mulahi kam. Aku TUHAN si ngerana enda."

Label:   Jeremia / Yeremia 











Selanjutnya:
Jeremia 2

Sebelum:
Jesaya 47

All Pustaka Sibadia - Perjanjian Lama:
Warta Jemaat

BACAAN ALKITAB SETAHUN:

MENU UTAMA:
Catatan Penting Tata Ibadah GBKP (Gereja Batak Karo Protestan)(7)
Khotbah GBKP 2016(7)
Khotbah GBKP 2017(9)
LAGU KITAB ENDE-ENDEN GBKP(218)
Partitur Lagu Karo(3)
Perpulungen Jabu-Jabu (PJJ) 2016(2)
Pustaka Sibadia - Perjanjian Baru(22)
Pustaka Sibadia - Perjanjian Lama(51)
Sermon Khotbah GBKP 2023(2)
Sermon Khotbah GBKP 2024(1)
Tentang GBKP(5)

Arsip Pustaka Sibadia - Perjanjian Lama..

Sermon GBKP setiap hari
Register   Login  


Sermon Khotbah Minggu GBKP 2024
     popular pages    |   Register    |  Login    | e-mail: admin@lagu-gereja.com   © 2012 . All Rights Reserved.