Tutui Makasososak 25 - lagu-gereja.com/gmit

lagu-gereja.com/gmit
Gereja Masehi Injili di Timor

View : 1239 kali

Kamis, 24 Nopember 2016

Tutui Makasososak 25

25
Abraham sao seluk
1 Abraham sao seluk inak esa, nade Ketura. 2 Ketura bonggi feen anak kara, sira: Simran, Yoksan, Medan, Midian, Isbak ma Sua. 3 Yoksan anan nara, sira: Seba no Dedan. Dedan tititi-nonosin nara, sira: hatahori Asyur, hatahori Etus, ma hatahori Leum. 4 Midian anan nara, sira: Efa, Efer, Henok, Abida ma Eldaa. Sira basa sara raa, Ketura tititi-nonosin.
5-6 Neu Abraham bei masodak, ana baꞌe fee Hagar ma Ketura anan nara ena, esa-esak no ndia hata-heton. Basa boe ma ana nadenu sara, fo reu leo nai dae Kanaꞌan boboan dulu, mita fo rakadodook ro ndia anan Isak. Tehuu basa ndia pusakan lalaꞌen, ana loo lima basa sara reu Isak.
Mate Abraham
7-8 Neu Abraham teun nara 175, boe ma maten. 9-10 Basa boe ma anan Isak no Ismael ratoin numa lua Makpela mana deka no Mamre. Fai bakahulun Abraham hasa dae naa numa hatahori Het esa nade Efron, ndia Sohar anan. Fai bakahulun ara oo ratoi Sara numa luak naa ena boe. 11 Mate heni Abraham, boe ma Manetualain fee Isak babaꞌe-babatik, losa ana leo-laꞌo no mole-damek. Lelek naa, Isak leo deka oe matak, manade Beer Lahai Roi.
Ismael tititi-nonosin nara
12 Ismael tutuin talo ia: Ndia naa, Abraham no sao murin Hagar anan. Hagar naa, Sara atan numa Masir mai. 13-16 Ismael ana toun salahunu dua. Naden nara tungga-tungga numa uluk losa muri anak, sira: Nebayot, Kedar, Adbeel, Mibsam, Misma, Duma, Masa, Hadad, Tema, Yetur, Nafis, ma Kedma. Kakanak kara raa, dadi reu bei-baꞌik ruma hatahori nusa-nusak salahunu dua mai, esa-esak no ndia nusa heli-helin. Ara foi nusak kara raa naden nara, esa-esak tungga sira baꞌin nara naden.
17 Neu Ismael teun nara 137, boe ma maten. 18 Tehuu tititi-nonosin nara esa musu no esa. De ara leo sasarak, mulai numa Hawila mai losa Syur, fo mana natoo no nusa Masir, nakandoo losa Asyur.✡
Esau no Yakob
19 Abraham anan Isak tutuin, talo ia. 20 Neu Isak sao nala Ribka, Isak teun nara 40. Ribka aman, Betuel. Ma naan, Laban. Sira raa, hatahori Aram numa Padan Aram mai.*
21 Ribka ta bonggi nala anak. Huu naa de Isak hule-haradoi neu MANETUALAIN fo noke-hule Ana buka Ribka ana manan. MANETUALAIN namanene ndia huhule-haradoin, boe ma Ribka nairu. 22 Naa te ana nairu anak dua. Tehuu kakanak kara raa kada rakosi-rasakak nai Ribka poꞌon dale. De Ribka natane nai dalen dale nae, “Tao hata de kakana kaduak kara iar, talo ia?” Basa boe ma ana natane MANETUALAIN.
23 Boe ma MANETUALAIN naselu nae,
“Nai o poꞌom dale hambu hatahori nusak dua, neu ko ara ramusuk taa-taa.
Neu ko muri anak barakain lena uluk.
Ma kaꞌak naue-osa fee fadin.”
24 Neu bula fain nara losa ena, boe ma Ribka bonggi ana duak, tou anak mesan. 25 Ana kaꞌak mbilas, ma basa ao-inan kabuluk. Huu naa de ara foin nade, Esau (fo dedeꞌa deꞌek naa liin sangga sama no dedeꞌa deꞌek laen, fo sosoa-ndandaan 'kabuluk").
26 Basa dei de fadin kalua. Tehuu ana toꞌu kaꞌan ei tinggan. Huu naa de ara foin nade, Yakob (fo dedeꞌa deꞌek naa liin sangga sama no dedeꞌa deꞌek laen, fo sosoa-ndandaan 'ei tinggak"). Neu bonggi dua sara, Isak teun nara 60 ena.
Yakob panake nala Esau haak ana uluk
27 Neu kakana kaduak kara raa ramoꞌo mamais, Esau dadi neu mana sombu ta hohoꞌak. Ana hii leo nai lasi dale. Tehuu Yakob naa mana neneek, ma ana hii nahani nai kada uma. 28 Isak hii naꞌa mbaa banda fui. Huu naa de ana sue nakalena Esau. Tehuu Ribka sue nakalena Yakob.
29 Laꞌe esa, neu Yakob nasu kua fufue, Esau bei fo sombu fali. Ana bengge-manggu ma ndoe nalan seli. 30 Boe ma ana nafada Yakob nae, “Fadi, ee! Au ndoe alan seli! De fee au, o kua mbilas manai urek naa faa dei, fo au isi neu au poꞌong.” (Huu naa de ara roken rae, Edom, fo dedeꞌa deꞌek naa liin sangga sama no dedeꞌa deꞌek laen, fo sosoa-ndandaan 'mbilas".)
31 Boe ma Yakob naselu nae, “Malole kaꞌa. Tehuu fee kaꞌa haak ana uluk neu au dei!”†
32 De Esau naselu nae, “Sokolaa heni haak ana uluk naa! O soan leo! Au ndoe alan seli ia ena. O sode lai-laik kua naa, fo munin mai leo, te au nau uꞌa ia ena.”
33 Tehuu Yakob kokolak seluk bali nae, “Kaꞌa mahani dei! Kaꞌa sumba-soo dei mae, kaꞌa fee haak naa neu au ena.” Boe ma Esau soꞌuk sumba-sook tungga naa. 34 Basa boe ma Yakob sode feen kua fufue naa no roti. Esau naꞌa-ninu basa, boe ma ana laꞌo.
No dalak naa, Esau fee mudak ndia haak ana ulun.

Label: 01 Tutui Makasososak

Nama Bayi Katolik Terlengkap, Tahun Liturgi Dalam Katolik, Kalender Liturgi Katolik 2026, Renungan Katolik 2025,

Selanjutnya:
Tutui Makasososak 26

Sebelum:
Tutui Makasososak 24

All Alkitab Bahasa Rote Tii - Genesis:

MENU UTAMA:
Alkitab Bahasa Rote Tii - Genesis(50)
Alkitab Bahasa Rote Tii - Perjanjian Baru(96)
Bacaan Alkitab GMIT 2017(12)
Contoh Tata Ibadah GMIT(39)
Khotbah GMIT 2017(3)
Khotbah GMIT 2025(11)
LAGU GEREJA ETNIK NTT(9)
Lagu Rohani Timor(3)
Pembacaan Alkitab GMIT(1)
Renungan GMIT 2022(33)
Renungan GMIT 2023(2)
Tentang Gereja GMIT(1)
Tentang GMIT(5)
xxx(11)

Arsip Alkitab Bahasa Rote Tii - Genesis..

Register Login

Links: lagu-gereja.com, bible., perkantas, gbi, gkii, gkj, hkbp, misa, gmim, toraja, gmit, gkp, gkps, gbkp, Hillsong, PlanetShakers, JPCC Worship, Symphony Worship, Bethany Nginden, Lagu Persekutuan,

Bacaan Alkitab dan Materi Khotbah GMIT 2019