Tutui Makasososak 21 - lagu-gereja.com/gmit

lagu-gereja.com/gmit
Gereja Masehi Injili di Timor

View : 1549 kali

Kamis, 24 Nopember 2016

Tutui Makasososak 21

21
Sara bonggi nala Isak fee Abraham
1-7 Basa boe ma MANETUALAIN fee babaꞌe-babatik neu Sara, tungga Ndia hehelu-bartaan. Sara nairu nai Abraham fai lasin. Neu ana nae bonggi naa, Abraham teun nara 100 ena. Fain nara dai, boe ma ana bonggi ana touk esa. De Abraham foi kanak naa nade Isak (fo sosoa-ndandaan 'ana hika").
Sara oo kokolak boe nae, “Manetualain tao nala au hika, nahuu hatematak ia au amahoko. Hatahorir duꞌa rae, nai au fai lasing ia, au ta bisa hambu anak ena. Naa te leo mae au sao toung lasik nggonggok ena, tehuu au bei bonggi feen. De hatematak ia, see a mesan namanene dedeꞌak ia, ara oo hika sama-sama ro au boe.”
Neu bonggi heni Isak faik falu, boe ma Abraham sunat ana, tungga Manetualain parendan.
Hagar no Ismael hambu huhusik
8 Basa boe ma Isak tamba namoꞌo. Neu rae filan, boe ma Abraham tao feta moꞌok.
9-10 Laꞌe esa, Sara mete-nita Ismael, fo Abraham sao murin Hagar anan, nakaminak nakoa-kandiaok no Isak. Sara mete-nita naa, boe ma kokolak no saon nae, “Husi heni ata-dato manuma Masir mai naa no anan leo! Au ta nau ana ata-dato naa simbo pusaka hata-hata. Kada au anang Isak mesa kana, ndia muste hambu basa sara.”
11 Abraham namanene Sara kokolak talo naa, boe ma ana nameda ta malole, nahuu Ismael naa ndia anan boe. 12 Tehuu Manetualain kokolak no Abraham nae, “Abraham! O boso duduꞌa o sao murim naa no anan. Tungga kada Sara hihiin, nahuu neu ko o hambu tititi-nonosik fo au helu-bartaak naa ena, nesik Isak. 13 Tehuu Au oo fee babaꞌe-babatik neu o sao murin anan boe, nahuu ndia oo, o ana heli-helin boe. Neu ko ndia tititi-nonosin oo dadi neu hatahori nusak esa boe.”
14 Neu beꞌe-mai huhua-anan, boe ma Abraham tao lepa-nggees fo fee Hagar, ma feen oe boto esa, ana nasalilin neu arun. Basa boe ma ana neu nafuli inak naa no anan Ismael, de ara laꞌo leo. Boe ma ara laꞌok ndule basa dae nees, mana deka nai Beer Syeba.*
15 Neu oe nininun nara basan ena, boe ma Hagar laꞌo ela anan neu ai huu anak esa saꞌon. 16 Boe ma ana duduꞌa nai dalen dale nae, “Au daleng ta nalak kana, mete-ita kanak ia mamaten.” Boe ma ana nakadedeak, de nanggatuuk doon nai rarain meter 50 numa kanak naa mai. De buꞌi nakarereu.
17 Manetualain oo namanene Ismael hara bubuꞌin boe, boe ma atan numa nusa tetuk do inggu temak mai, nanggou Hagar nae, “Hagar! Tao hata de o susa-sona talo ia? Boso mamataꞌu, huu Manetualain namanene kanak naa bubuꞌin ena. 18 Hatematak ia o mambadeik leo fo muu mete kanak naa. Tao matetea dalen, huu neu ko Au ae tao ndia tititi-nonosin dadi neu hatahori nusak ta hohoꞌak esa.”
19 Basa boe ma Manetualain tao nambaloa matan, de mete-nita oe matak esa numa naa. Boe ma neu nadai oe neni boto naa neu, de neu fee kanak naa ninu.
20-21 Basa boe ma Ismael no inan leo numa moo sarakaek Paran. Ana namoꞌo mamais a, boe ma ana dadi neu mana kou malelak. Basa boe ma inan feen sao nala ana feꞌo Masir esa. Basa iar dadi, nahuu Manetualain sama-sama no Ismael.
Abraham no Abimelek mole-dame numa Beer Syeba
22 Lelek naa, manek Abimelek no ndia malangga musun, nade Fikol, mai ratonggo ro Abraham. Manek kokolak nae, “Abraham! Ai bubuluk ena mae, Manetualain sama-sama no o. Huu naa de o tao hata a mesan, basa-basan dadi. 23 De hatematak ia au oke o soꞌuk sumba-sook nai Manetualain matan mae, o ta pepeko-leleko au ua umbu-anang nggara. Sama leo au atudu au dale susueng neu o ena, de o muste matudu o dale susuem neu au ma nusak ia boe.”
24 Boe ma Abraham naselu nae, “Hou! Au sumba-soo.”
25 Tehuu basa boe ma Abraham kalaak manek nae, “Papa manek hatahorin nara leꞌa rala au oe matang esa.”
26 Manek namanene nala naa, boe ma naselu nae, “Awii! Au bei fo amanene dedeꞌak ia. Tao hata de papa ta kalaak numa fai bakahulun mai? Au ta bubuluk see ndia tao.”
27-28 Basa boe ma Abraham no Abimelek ndara fangga hehelu-bartaak. Boe ma Abraham leꞌa sapi ma bibi lombo fo fee manek. Basa de ana tada feꞌe bibi lombo tenak hitu bali. 29 Boe ma manek natanen nae, “Tao hata de o tao talo naa?”
30 Abraham nafada nae, “Papa manek simbo mala bibi lombo tena kahituk kara iar fo dadi neu tanda rae, papa manek manaku, au ndia kali oe matak ia.”
31 Huu dua sara soꞌuk sumba-sook numa naa ena, de ara foi mamanak naa nade Beer Syeba. Sosoa-ndandaan nae, 'Oe mata Sumba-sook".†
32 Ara sumba-soo basa, boe ma manek Abimelek no ndia malangga musun fali reni sira nusan Filistin reu. 33 Basa boe ma Abraham sele ai huu tamariska‡ esa numa Beer Syeba. Mulai numa lelek naa neu, ai huuk naa fee nesenenedak neu Abraham, fo numa naa ana nakaluku-nakatele neu MANETUALAIN mana Masodak Losa Doon Naa Neu. 34 Basa boe ma Abraham leo taak nala dook ka numa hatahori Filistin nara nusan.

Label: 01 Tutui Makasososak

Nama Bayi Katolik Terlengkap, Tahun Liturgi Dalam Katolik, Kalender Liturgi Katolik 2026, Renungan Katolik 2025,

Selanjutnya:
Tutui Makasososak 22

Sebelum:
Tutui Makasososak 20

All Alkitab Bahasa Rote Tii - Genesis:

MENU UTAMA:
Alkitab Bahasa Rote Tii - Genesis(50)
Alkitab Bahasa Rote Tii - Perjanjian Baru(96)
Bacaan Alkitab GMIT 2017(12)
Contoh Tata Ibadah GMIT(39)
Khotbah GMIT 2017(3)
Khotbah GMIT 2025(11)
LAGU GEREJA ETNIK NTT(9)
Lagu Rohani Timor(3)
Pembacaan Alkitab GMIT(1)
Renungan GMIT 2022(33)
Renungan GMIT 2023(2)
Tentang Gereja GMIT(1)
Tentang GMIT(5)
xxx(11)

Arsip Alkitab Bahasa Rote Tii - Genesis..

Register Login

Links: lagu-gereja.com, bible., perkantas, gbi, gkii, gkj, hkbp, misa, gmim, toraja, gmit, gkp, gkps, gbkp, Hillsong, PlanetShakers, JPCC Worship, Symphony Worship, Bethany Nginden, Lagu Persekutuan,

Bacaan Alkitab dan Materi Khotbah GMIT 2019