lagu-gereja.com/gbkp
Gereja Batak Karo Protestan
View : 1076 kali
Pustaka Sibadia - Perjanjian Baru
Jumat, 14 Oktober 2016

Roma 3
1Adi bage i bas kai nge lebihen kalak Jahudi e asangken bangsa si deban? Ntah lit kin nge gunana isunatken e? 2Tentu mbue i bas kai pe! Perlebe: sabap man kalak Jahudi me perlebe iendesken Dibata perkatan-perkatanNa. 3Dage adi lit piga-piga kalak Jahudi la setia man Dibata, iakapndu kin maka erkiteken si e Dibata lanai setia man padanNa? 4Tentu lang! Tapi bagenda kap. Dibata e tetap nge i bas ketuhu-tuhun aminna gia kerina manusia perguak. Bagi lit tersurat i bas Pustaka Si Badia,
"I japa pe Kam ngerana, Kam tetap nge ibenarken.
Katawari pe menang nge Kam, adi iaduken kalak Kam."
5Tapi kuga, adi arah kesalahenta e reh ulina teridah kebujuren Dibata? Kuga ninta? Salah kin perbahanen Dibata e adi iukumna kita? (Aku ngerana i jenda bagi biasana manusia ngerana.) 6Tentu lang! Sabap adi la kin adil Dibata e, labo banci iadilina doni enda.
7Umpamakenlah lit kalak si atena ersoal, nina, "Adi arah kejahatenku e maka ertangkasna teridah keadilen Dibata seh maka la ipermuliaken, ma patut min aku lanai iukum Dibata bagi kalak perdosa? 8Dage ngkai maka la sibahan si jahat, gelah arah kejahaten e reh si mehuli?" Si tuhuna lit nge kalak si encekuraki aku alu ngataken maka si enda me kuajarken. Kalak enda la banci la iukum bagi patutna.
Kerina jelma e me kalak perdosa
9Dage, ulin kin kita kalak Jahudi asangken si labo kalak Jahudi? Sitik pe lang! Ndai enggo kupetangkas i das maka subuk kalak Jahudi bage pe bangsa si deban kerina i teruh kuasa dosa. 10Bagi lit tersurat i bas piga-piga kitap i bas Pustaka Si Badia,
"La lit ise pe bujur i lebe-lebe Dibata,
11la lit ise pe si pentar,
la lit ise pe ndarami Dibata.
12Kerina manusia enggo nilah i bas Dibata nari;
kerina ia enggo macik;
la lit ise pe erbahan si mehuli, sada pe lang.
13Kalah-kalahna desken lubang kubur si talang
nipu ia alu dilahna,
janah i bas biberna nari ndarat kata-kata desken bisa nipe si erbahanca kalak mate.
14Babahna dem alu sumpah si pagit.
15Nahena pedas ngayak-ngayak dingen munuh kalak.
16Gedang-gedang dalan si ibentasina, ibahanna kecedan dingen kesusahen.
17La pernah idalanina dalan perdamen.
18Bage pe la diatena erkemalangen man Dibata."
19Sieteh maka kerina si ikataken Undang-undang e, itujuken man kalak si nggeluh i teruh Undang-undang, gelah olanai lit kalak si erdalih janah gelah doni enda lanai lit ampang-ampangna nandangi ukumen Dibata. 20Sabap labo ise pe banci rembak ras Dibata adi arah ndalanken Undang-undang. Undang-undang e gunana e me gelah ierti manusia ia erdosa.
Uga Dibata ngerambakken diriNa kempak manusia
21Tapi genduari cara Dibata ngerembakken manusia kempak diriNa enggo ipetangkas, janah si e la lit sangkut pautna ras Undang-undang. (Si tuhuna Undang-undang Musa ras kitap nabi-nabi mereken kesaksin maka si e tuhu kap.) 22Dibata ngerembakken manusia kempak diriNa erkiteken kiniteken manusia e man Jesus Kristus. Kerina kalak si tek man Kristus iperembak Dibata ras diriNa sabap bali nge kerina manusia enda. 23Kerina manusia enggo erdosa janah enggo ndauh sirang ras sura-sura Dibata si mejile. 24Tapi arah pemere Dibata erpalasken lias ateNa, kerina manusia irembakken Dibata kempak diriNa, arah pertebusen si ibahan Kristus Jesus. 25Dibata enggo netapken IA jadi sada persembahen gelah arah IA engkorbanken diriNa seh mate, kerina dosa-dosa manusia isasapken dingen pernembeh ate Dibata ipepalem, adi tek ia man Jesus Kristus. Arah si enda icidahken Dibata maka IA bujur kap. Nai nari isinikken Dibata saja kerna dosa-dosa manusia, 26janah la IA megelut. Tapi i bas paksa si genduari enggo iukum Dibata dosa-dosa manusia i bas diri Jesus Kristus. Arah si e icidahkenNa maka IA adil, janah radu ras si e irembakkenNa kempak diriNa kerina kalak si tek man Jesus.
27Dage labo lit si man megahenken manusia. Engkai makana bage? Sabap manusia ikelini Dibata labo erkiteken ndalanken Undang-undang, tapi erkiteken tek ia man Jesus Kristus. 28Dage, manusia banci rembak ras Dibata labo erkiteken manusia e ndalanken kai si ituntut Undang-undang, tapi erkiteken tek man Jesus Kristus ngenca. 29Ntah kin Dibata e Dibata kalak Jahudi saja ngenca? Ma kin IA pe Dibata bangsa si deban nge? Tentu. 30Sabap Dibata e sada ngenca. Dibata ngerembakken kalak Jahudi si ersunat e kempak diriNa erkiteken ia tek man Jesus Kristus; bage pe irembakkenNa kalak si deban si la ersunat kempak diriNa erkiteken kalak enda pe tek man Jesus Kristus. 31Adi tek kita man Jesus Kristus, sicedaken kin Undang-undang e? Kutera pe lang! Tapi arah si e sitamaken Undang-undang e i babo palas si lebih enteguh.











Selanjutnya:
Roma 4

Sebelum:
Roma 2

All Pustaka Sibadia - Perjanjian Baru:
Warta Jemaat

BACAAN ALKITAB SETAHUN:

MENU UTAMA:
Catatan Penting Tata Ibadah GBKP (Gereja Batak Karo Protestan)(7)
Khotbah GBKP 2016(7)
Khotbah GBKP 2017(9)
LAGU KITAB ENDE-ENDEN GBKP(218)
Partitur Lagu Karo(3)
Perpulungen Jabu-Jabu (PJJ) 2016(2)
Pustaka Sibadia - Perjanjian Baru(22)
Pustaka Sibadia - Perjanjian Lama(51)
Sermon Khotbah GBKP 2023(2)
Sermon Khotbah GBKP 2024(1)
Tentang GBKP(5)

Arsip Pustaka Sibadia - Perjanjian Baru..

Sermon GBKP setiap hari
Register   Login  


Sermon Khotbah Minggu GBKP 2024
     popular pages    |   Register    |  Login    | e-mail: admin@lagu-gereja.com   © 2012 . All Rights Reserved.